يوم في حياة اتنين عواطلية, ؟؟؟؟؟؟؟؟؟؟؟؟؟؟؟؟؟؟؟؟؟؟

شوفوا يومهم عامل ازاى يوم النتيجـه (البكالوريا)

تررررررن تررررررررن تررررررررررن

الام : الو

هشام : الو..... ازيك يا طنط عامله ايه

الام : الحمد لله و انته عامل ايه يا ابنى

هشام: تمام الحمد لله ممكن اكلم على

الام : و الله على نايم دلوقتى بس لو فى حاجه ضرورى ممكن اقولهالو .....

و لا تحب اصاحيهولك

هشام : ياريت يا طنط تصحيه معلش يعنى

الام : حاضر يا بنى

يا علىىىىىىىىىىىى يا علىىىىىىىىىىى كلم صحبك هشام على التليفون

على : حاضر يا امى انا كونت قايم اصلا

على : الو ........... مين معايه

هشام : كونداليزا رايس

على : يا بنت الايه و مال صوتك احلوكده ليهه

هشام : يا عم انا هشام انته هاتستظرف على الصبح

على : بس احنا المغرب دلوقتى يا اتش

هشام : تصدق يلا انا حيوان اصلا ان انا اتصلت بيك علشان اقولك انك اتزفت نجحت

على : طيب ما انا عارف

هشام : عارف ايه ..... عارف انك نجحت

على : لا ...عارف انك حيوان

هشام : ايوه يا عم هزر هزر ما هو الناجح يرفع ايدو

على: اشمعنهه

هشام : انته هاتخشلى افيه

على :خلاص يا عم .... المهم التقدير ....هاه التقدير ايه

هشام : مش فاهمك الحقيقه ....ممكن توضحلى النقطه دى

على : بقولك التقدير انا جبت تقدير ايه

هشام : يا عم انته هاتعيش دا انته لولا درجات الرافه كانت بقت تالت سنه ليك فى رابعه

على : يا عم انته هاتزلنى

هشام : عم ايه انته شايفنى واقف تحت بيتكوم مشلح الجلبيه و بقول مسكره يا جوافه

على : مكنتش اعرف ياد ان كليه تجاره بطلع ناس بالمرح و الخفه دى كلها

هشام : يلى معلش عيد الام بقه

على : بلا عيد الام بلا عيد العمال المهم انت عملت ايه

هشام : انا الحمد لله طلعت بجيد

على : و هو احنا عندنا ماده اسمها جيد...لا حول و لا قوه الا بالله ..يلا ربنا معاك يا اتش

هشام : يخرب بيت الزفت الى بتشربو ومطينلك دماغك ده انا جبت تقدير جيد ياض

على : طيب كويس ربنا يوفقك و مقبول من جيد مش هاتفرق

هشام : على رايك

على : هاه هانعمل ايه دلوقتى

هشام : الحقيقه مش عارف ....محتار بين بيض بالبسطرمه و فول بالسجق

على : يا راجل .... مش تقول انك محتار كده
انا اقولك بص انته تعمل عبيط

هشام : خلااااااااااص يا عم انا اسف

على : اسفك مش مقبول ...بس بجد هانعمل ايه بعد ما اخدنا البكالوريوس

هشام : هانبدا بقه رحلت البحث على شغل كويس علشان ناكل عيش

على :و انتو معندكوش عيش فى البيت و لا ايه

هشام :لا معندناش و مين قالك ان احنا معندناش

على : لا ابدا جالى هاتف

هشام : و جبتو على كام

على : لا هو اتمختر و جالى لوحدو

هشام : بس انا بجد مخنوق اوى من حكايه الشغل دى يا على

على : هـــــــه .....يارب

هشام : يارب ياعم .. بس انته عارف الوسايط و الكلام ده مالى البلد

على: تحيا جمهوريه مصر العربيه يا عم

ماتخفش يا عم ربنا هايفرجها انشاء الله

هشام : و الله يا على ان لولا كلامنا و تهريجنا مع بعض فى بلدنا دى كان الحال رسى بينا على حاجتين

يا اما كنا ولعنا فى نفسنا

يا اما كان اتولع فينا