الجوازة دي ... لايمكن تتم !!!‏

بما ان لينا اصحاب ياما .. الحمد لله خطبوا ... عقبال الجميع ان شاء الله ... واكيد بنشوف الفرحة في عينيهم , بس كمان بنشوف القهرة في عينيهم ؟؟؟؟؟؟؟؟

واحد هيقولي ليه ؟؟؟؟ هرد عليه واقوله ... لانه دخل في الجد ( اول منازل الاخرة ) ... هيتجوز

طب ليه القهرة دي ... وليه نظرة الحزن اللي دايما بنشوفها في معظم من دخلوا في معمعة الجواز ؟؟؟؟؟؟؟؟

سؤال يمكن اعرف اجاوب علي جزء منه .....

وهيتجوز يعني لازم يكون نفسه ..... ويكون نفسه يعني يحوش فلوس عشان يجيب طوفان الطلبات اللي ياعين امه هيجيبها عشان بيت الزوجية ..

وعشان يحوش فلوس ويبدا حياته لازم يبقي فيه نوع من الرحمة من الاهالي .... لازم يبقي فيه تقدير ان الشاب ده عايز يكمل نص دينه وعايز يتجوز باسرع وقت .... فمنكملش عليه بطلبات عجيبة ملهاش اي لازمة

يبدا الموضوع من ساعة مالواحد مننا يخلص الكلية ( وياريته ماخلصها ) وبعدين يلاقي شغل ( طبعا دي كدبة ابريل .... قال يلاقي شغل قال ... سهلة كدة ؟؟؟)

وبعدين يكون منمر علي بنت الحلال ... وهي منمرة عليه .... وبعدين يتفق انه يروح يتقدملها رسمي ....( طبعا لما بيشوف اللي بيحصله بيقول ياريت كان لساني اتقطع قبل ماتفق اني اروح عندهم ولاد ال.... الناس الطيبين دول )

ويروح ويقعد بقي وغرقان في عرقه ... وهي تدخل عليهم بصنية الشاي وماتيسر من الجاتوه ... ومن كسوفها تروح مطربقاها علي دماغ الواحد مننا ياعيني ... حاجات لذيذة من اللي بتحصل دي

المهم يتكلم مع ابوها في الاول ... ويسمع الجمل الهادئة اللي بتسبق العاصفة ... يابني احنا بنشتري راجل ... يابني المهم الشخصية ... احنا اخر حاجة نفكر فيها هي الفلوس .... طالما انت كويس يبقي كله في التمانيات

يفرح الواد ياعيني ... ويرقص قلبه من الفرحة ويقول في عقل باله ( امال بيقولوا الجواز مش سهل ليه ؟؟؟؟؟؟؟؟ بس طبعا دي اللهوجة بتاعت الشباب زي ماحنا عارفين ) ......وياعيني يافرحة ماتمت ؟؟؟؟؟؟

يدخلوا بقي للطلبات (البسيطة) واللي من جهة نظر الاهل انها مطالب مشروعة لبنتهم ( تأمينا لمستقبلها ) ..... مهر بقي ومقدم ومؤخر وشبكة وشقة وعفش بمبالغ بالنسبة للشاب تعتبر ..... خيال علمي ..

وبعدين يبدا الواحد مننا يقول ماشي هكون نفسي ونجيب بقي حاجة حاجة .... وربنا يدينا ويديكم طولة العمر بقي ( ده في حالة مااذا لقي شغل ... ولو لقاه يبقي بمرتب كويس عشان يعرف يحوش ... )

طبعا خد عندك ... قراية الفاتحة لازم يجيب ( دي جي ) ولمة بقي وادفع ياعريس .... وبعد كدة الخطوبة واكل ومعازيم اد كدة... وتلبيس الكلبشات ( الدبل والشبكة يعني ).... والبس ياعريس

وتيجي تشوف الواد ياعيني في الخطوبة ... تلاقيه فرحان وفي قلبه الف دمعة .... ياتري هيلحق يعمل اللي اتفق عليه ازاي ؟؟؟؟؟ وطبعا راحة البال كدة راحت .... والواد وشه يصفر ويخس النص ... وتبان عليه معالم البؤس ... عرفتوا ليه الجواز اول منازل الاخرة ؟؟؟؟؟؟؟؟؟

وللاسف في حاجة هو مش واخد باله منها ولا احنا واخدين بالنا منها .... هي موضوع الهدايا والشيل اللي بيلفحها علي قفاه وهو داخل كل مرة عند خطيبته ....

منين هكون نفسي عشان اجيب الهم اللي علينا ده ... ومنين مع كل مناسبة لازم هدايا وشيل بمبالغ وقدرها اسبوعيا ع الاقل

تيجي بقي فترة الخطوبة ( اللي هيكون فيها نفسه ... واخدين بالكم ) وفترة الخطوبة غالبا بتبقي سنتين عند معظم الناس

ومع كل مناسبة لازم يجيب هدية لخطيبته ... يعني اللي حوشهم من هنا بيدفعهم من هنا .... يعني مثلا
في مصر متعودين ان اي واحد يخطب ... مع اي مناسبة لازم هدية طبعا ... والا اهل العروسة يغضبوا عليه ...وخصوصا حماته .....

وياويله لو قال دي حاجات هايفة او حبب يقول انها مش لازمة يعني كل اسبوع ..... لو راجل ابقي قولها قدامهم

وممكن يعتبروه انه راجل ايحة وجلدة وبخيل ومقشفر ومعقد ومنخرق ومتزمد .... خد عندك بقي

والاعياد .... بيبيقي الكل فرحان ماعدا اللي خاطب ... هو بيبقي فرحان وكل حاجة بس اول مابيسمع في المحل سعر الفاتورة اللي اشتري بيها الحاجات ... بتجيله حالة من الانهيار مع صداع مصاحب بزغلله وغثيان

.. لكن بتعدي مع مرور الوقت

يعني لازم الواحد يدي خطيبته عيدية مئوية + ماتيسر من هدوم حريمي وعبايات وخلافه + عيديات لاخواتها + خروجة علي حساب اللي جابوه ليها في افخم الاماكن ..... شوفوا موضوع زي ده يتكلف كام ؟؟؟؟؟؟؟؟؟؟؟؟؟؟ صحيح ياولاد ... العيد فرحة

واي مناسبة من اي نوع ... اهل العروسة يستنوا العريس هيجيب ايه .... يعني مثلا طلعة رجب لازم يجيب حاجة ... ليلة الاسراء والمعراج اهل العروسة بيخلوها مناسبتين ( هدية بمناسبة الاسراء وهدية بمناسبة المعراج .... اه حاكم الناس مش مختومة علي قفاها .. هيكروتهم ولا ايه ؟؟؟؟ )

.... ليلة النصف من شعبان حاجة .... رمضان ( وده شهر بحاله يعني خراب بيوت مستعجل ... مابين عزومات وياميش وماخفي كان اعظم ) والاعياد زي ماقولنا فوق ....

وده غير انه بيزورها مرة اسبوعيا .... وكل مرة طبعا لازم يحمل ويجيب مالذ وطاب .... طب بذمتكم ده هيكون نفسه ازاي ؟؟؟؟؟؟؟؟؟؟؟؟؟؟

يعني هو الواحد بيقبض كام ويحوش كام .... عشان يجيب كمية الهدايا الرهيبة دي ؟؟؟؟؟؟؟؟؟؟

يعني اي واحد لو فكر انه يحوش الفلوس اللي صرفها ع الهدايا كان زمانه حوش فلوس ملهاش اول من اخر ... وكان زمانه اتجوز من زمان ... او اضعف الايمان انه يعمل حاجة مفيدة بالفلوس دي بدل الهيافات دي

وطبعا مش الهدايا وبس هي اللي بتخلي الجواز صعب .... لالالالالالالالالالا

يبقي الجوازة دي لايمكن تتم

ولا ايه رايكم ؟؟؟؟؟؟؟؟؟؟؟؟؟؟