ده مش ليكى ... ياللى عايزة جمال رومانتيكى !!

[center]سلام عليكم و رحمة الله يا بناتنا الكتاكيت ..

كلامى النهارده حبيت يكون عن ركن مهم لكل وردة فيكم .. و هو ركن الجمال ,, لكن الجمال من نوع خاص و هو الجمال اللى مش رومانتيكى زى ما سميته .. او يعنى مش جمال العيون و الشعور و الحواجب و الخدود و الحاجات اللى بنسمع عنها فى الاغانى و بس !!
طبعا دا مهم و كل حاجة لاى واحد بيختار شريكة حياته .. و لكل بنت حقها الطبيعى و الصح انها تهتم بنفسها ,, لكن الاولويات يا بنات هى اللى اقصد عرضها هنا او افكركم بيها لانى متاكد انكم على دراية بيها اكيد .. بس التذكرة تنفع برضه !!

ارجع و اقول انى هاتكلم عن الجمال الروحانى و اللى يرفع الفتاة و يرتقى بيها اكتر و اكتر و يحسن صورتها قصاد نفسها و قصاد الناس و طبعا قصاد رب العزة جل و علا قبل اى شئ ....
و المضمون كله هايكون فى كلامى عن جوانب و تفاصيل الركن ده من جمال البنت و اللى اظن ان اللى بتهتم بجمالها الظاهرى - الرومانتيكى - بس هاتهتم بيه الاهتمام المفروض !!
زى ايه بقى الجوانب دى ..تعالوا نشوف

- الابتســامة :
البسمة و الابتسامة عناوين الرقة و الذوق السليم كمان .. فخى ابتسامتك موجودة دايما وصفة مميزة لوشك و علامة واضحة فى اخلاقك و تعاملك .. خليها موجودة فى السلام وقت اللقاء , و الوداع , و ابتسمى كمان وقت الاستئذان , لما تكونى بتسالى عن حاجة . و لما تقدمى الشكر عن حاجة .. كل ده محتاج ابتسامتك و بتفك روابط كتيرة اوى بينك و بينك صحباتك و الناس عموما و بتخلى فيه القبول الحسن على طوووووول الخط !!

- اليد الندية :
الجفاء فى العون من الحاجات الخطيرة جدا ربنا يعافينا كلنا منها .. فبلاش تتردى كبنت فى عون من يلتجأ ليكى و لو بالكلمة الحسنة و الوجه البشوش او النصيحة الطيبة او الدعوة الصالحة .. كلها حاجات تعنى الاحسان و هو معنى كبير اوى فى ديننا كمؤمنين و الحمد لله و له مردود هايل على اللى حواليكى و يلاقى منك كدا .. يقول ابن عباس " رضى الله عنه " : لا يتم المعروف إلا بثلاث، تعجيله، وتصغيره، وستره، فإنه إذا عجله هنأهُ وإذا صغره عظمه، وإذا ستره تممه .

- الافتخــار :
التفاخر بالمال و الجمال و الاصل و الحسب و النسب الطيب .. كلها حاجات حقايق فى حياتك بس مفيش داعى للتفاخر بيها فى غير محلها او دايما لان الحقيقة الاوقع انك لسه صانعة كل ذلك .. و الوضع الاحسن ان الناس هى اللى تتكلم او تذكر بكل حسنى اصلك و نسبك الطيب و رفعة مستواكى ولا انهم يتكلموا عنك بانك محدثة نعمة و مغرورة لا سمح الله .. يقول الفاروق عمر بن الخطاب " رضى الله عنه و ارضاه " : ما وجد أحدٌ في نفسه كبراً، إلا من مهانة يجدها في نفسه .

- اّلامــك :
اذا كنتى حاسة بأى الم عندك و جواكى .. مفيش داعى انك تقضى وقت كبيييير اوى فى الشكوى من الالم للى حواليكى و ذكر المتاعب اللى فيه و ممكن انتى توصلى لعلاج المك ده ولو بشكل مبدأى مع نفسك و اللى حواليكى تعرضى الامر بشكل عام للمشورة و انك تسمعى النصيحة , على الاقل عشان ممكن يكون فى اللى حواليكى عنده هموم و اّلام مش تسمح بانه يهتم باّلامك دى ..

- الشهــادة :
انا معايا شهادة كذا و كذا و كذا و مؤهلات كذا و كذا و ..... !!
كلامك عن الشهادات و المؤهلات مش الشئ الكويس على طول الخط و مش دايما دليلا على الثقاقة الواسعة و العلم الزايد عندك .. انما خلى كلامك و اسلوبك و تعاملك الحسن دليل على شهاداتك و مؤهلاتك و مثل يحتذى به كمان لكل اللى حواليكى .

- العيــوب :
مثلا لو قعدتى فى مكان فيه عدد من صحباتك و فيهم واحدة سمينة .. مش ينفع خالص انك تتكلمى عن الرشاقة و اضرار الكرش و السمنة و البدانة و الحاجات دى ,, بشتى السبل هاتفتكرك بتتكلمى عنها و طبقى بقى المبدا ده على بقية العيوب اللى تشوفيها قصادك ..

- الــذوق :
حاجتين اخدت بالى منهم اوى و كتير سمعت عنهم انهم مش يليقوا خالص مع ذوق و جمال الفتاة و هما انك تطرقعى صوابعك بين الناس او انك - سورى يعنى - لازم تحطى اصبع ليكى على لسانك قبل ما تقلبى صفحة مجلة او كتاب .. طبيعى جدا يكونوا على الاقل حاجة غريبة على طابع البنت عموما صاحبة الجمال الروحى و الظاهرى كمان ..

- النظـــر :
انك تبصى بكل احترام و اهتمام لاى حد بيكلمك مادام بيتكلم بادب و احترام و فى شئ مهم يبقى الطبيعى و من حق المتكلم معاكى انك تبصى فى وشه .. لان تحريكك للموبايل فى ايدك او انك تبصى يمين و شمال ممكن يزعل اللى بيتكلم , و مذكور عن النبى " صلى الله عليه و سلم " من اداب حديثه انه كان بينظر فى وش المتكلم معه بكل ادب و انتباه .

- الصـــوت :
خير الامور الوسط .. و كل اللى اتكلمت فيه تحريت فيه الوسط اوى اوى عشان مش اكون مهاجم لشئ لا سمح الله ولا انى مبالغ فى شئ لا قدر الله .. فبالنسبة للصوت لازم يكون سلس و مفهوم يعنى مش يكون هادى لدرجة انه مش يتسمع اصلا ولا يكون عالى يخلى اللى حواليكى يفكروا بشكل مش ظريف فيكى .. ربنا يحفظكم من كدا طبعا !!

- الأمــــل :
اخيرا و هو البداية لكل شئ فى الدنيا هو الامل .. الدنيا مليانة حاجات كتيرة اوى اوى ممكن تتعثرى فيها لكن بلاش الاستسلام للوقوع بسبب الحجارة دى اللى ممكن تعطلنا ,, بالعكس اجمعيها و خليها معاكى كمان فى حوزة ايامك عشان تستفيدى منها و تبهى منها اللى حواليكى و اهو يبقى شلتيها من طريق اللى يتبعك فى كل حاجة صح كمان ..
و لكل بنت مش عندها اللى اتكلمنا فيه دا كله .. الامل عندها انها تبقى كدا و تنمى نفسها فى كل اللى قولناه هو برضه المفتاح ..!!

يارب ما اكون طولت عليكم اكتر من اللازم .. و يارب يكون موضوعى افادكم و اكون قدرت اوصلكم الشئ الصح بالطريقة الوسط و عايز اقول ان كل اللى قولته معترف انه و لله الحمد موجود و احسن من كدا فى بناتنا المسلمات بشكل كبير جدا جدا جدا ..

[/center]

» لحظة من فضلك! انت ياللى هناك تعالى اسمعنى بس
» جمال وقلب وعقل آدم
» ماهو جمال الروح
» كيف تحافظين على جمال عينيك
» 9 عادات تدمر جمال البنات